[الدخلة]

تشب

اسمع مليح papi

اه

[المقطع الوحيد]

يما سمحيلي أنا هربت من دارنا sans سمير

إذا شفتيها ظاهريا راه sens pire

درت اللحية وقلّعت فالـ champ de tir وقنّعت

شفت الفسق وبْلَعت وضركا صوتي سمّعت

بدات الحكاية نهار دخلت للجامع وأنا صغير

ثم دّيت la base وثم بديت ع الدين نغير

ماما غروني، أنا شفت المجتمع في خطر

ڨالولي "الجنة sûr"، ڨلت "نروح بروحي نخاطر"

لي داوني ماما كانو ناس يبانو تع تحصين

بانو ملايكة فالصح وهوما موديفياو التفسير

الاول عرفتو فأنترنت، مقالاتو شابين

السيد جاي مالشام، مسمي روحو أسد الدين

ثم بديت الإسبال، اللحية نطلقت حبال

بروبوزاولي لا نقبل نروح وعطاني أسباب

ڨالي الجنة ڨريبة ليك وأنا نفتحلك الباب

شفت فروحي ڨلت "علاش ما ننصرش الإسلام؟"

برا شفت المنكر، ماما كيفاش ما نتغمش؟

كلام الله لي يعبر والمجتمع لي ما يفهمش

ڨلتلو "كيفاش السبيل"، ڨالي "بعثلي les données"

فالسيفياولي فيزا للدوحة، من قطر بعثوني

رفدت الكابة وقلّعت، ديزاكتيفيت التخمام

جاني passeport سعودي فيه مكاشيا فيزا لبنان

فالطيارة قلبي مزيّر، الهبطة في بيروت

ڨعدنا يوم أنا والخاوة وشڨيناها حدود

معايا مروكي ومصري وle guide نتاعنا من باريس

دخلنا سوريا نخمو، ربي راهو علينا حارس

ركبنا فـ bus ولي فيه ڨاع دايرين اللحية

ڨالك "تروحو لحلب وتموتو ولّا تحياو"

لحقنا لـ à Liban حطوني نقرا في كلاصة

فيها علام التوحيد، لا سبورة، لا طلاسة

دخل السيد يخطب ولا علاقة بالدين

بدا يقنع فينا بلي حنايا هوما المجاهدين

داونا يعلمونا نتيرو، ماما هذاك لي كان

عطاوني سلاح بـ numéro de série américain

جابولنا نسا، ڨالولنا "هاكو جهاد النكاح"

ماما كنت خايف، هاذو والله ما قنعوني ڤاع

ڨالك "تهبط للـ terrain، تسيي فالناس لي ارتدو"

عطالي موس بيدو، ڨالي "كبَّر وشدّو"

جابولنا 3 رجال، ڨالولنا "هاذو كفار"

مبروك عليكم اليوم راح تاخذولنا بالثار

السيد كان مكسّل، الدمعة في عينو مكبّل

يخمم في ولادو لي مخليهم، خايف راح يتڨتل

فالأول غاضني وجيت رايح باش n'intervené

خفت يشكو في إيماني، أنا لي يڨتلوني

شدّيت الموس وراسو، ذكرت ربي والرسول

غرق في دمو وأنا نجوز فيه الموس الحاصول

ماما كي ذبحت الأول مور ما ڨالولي "مُرتد"

بصح كيفاش وأنا لي سمعتو بوذني كان يشهد

ما رڨدتش ليلة ولا زوج ومبعد رفدت الصنعة

ولّيت نفني فيهم، عادت ما تغيضنيش الدمعة

سماوني أبو مصعب وثم ديت السمعة

ولّيت شوية معروف وثم زوجولي ربعة

هبطت للـ champ de tir، شاد سلاحي ونكبّر

ڨابلت الموت والـ pire لي نلقاه نكفّر

في وسط ديار رايبين وجبادور مغبّر

وما كناش خايفين، خلاص الڨلب تعمّر

ڨتلت كبير وصغير، normalement ما نرتحش

حبيت sens pure، حنايا لي سماونا داعش

شحال من واحد مصغر كان معايا وطرطرڨ روحو

مور ما ڨالولو "حنا كي نموتو لحور العين نروحو"

ماما كانو غالطين وڤاع يعرفو هاذ الحكاية

حتى أمير المؤمنين ڨادر يدّيلي نسايا

بعثوني خطرة نجيب تمويل وحسيت روحي غريب

لي عطالي سلاح ودراهم كان في يدو موشم صليب

ولّيت لحلب، ڨالك "يحتاجوك في دير الزور"

مع الكتيبة رحنا ودمي كان سخون يفور

لحڨنا لثما لڨينا رصاص والعدة والعتاد

ڨالك "ناطاكو حزب الله معاه قوات الأسد"

ماما كي زدمنا أنا كنت مع الصفوف الأولى

وفبالي حنايا لي راح نبنو، راح نديرو دولة

ماما تيراو عليا وراني طايح بين الأنقاض

راني نسجلك هاذ الحكاية وما لڨيتش الألفاظ

ماما وقيل نموت وماكاش لي يسمع بيا

علاش غير ضرك لي تحلبت بلي لعبو بيا

انا لي كنت bête، شفت بعيني وكنت نكذب

ڨالولنا "الموت تجيكم ساهلة"، علاش راني نتعذب؟