[المقدمة]

بُعد، وعد، رعد، رعب

صعب، وقعت، سمعت، ضعت

بُعد، وعد، رعد، رعب

صعب، وقعت، سمعت، ضعت

[المقطع الأول]

بصيت في المراية لقيتني ما أعرفنيش

أنا ابن إنهاردة ولا أنا ابن الماضي

واحد واقف قصادي مش سايبني أعيش

كتب ليا رسالة بيقول فيها الآتي

أما بعد هبدأ الكلام بوعد

هفضل معاك لو إنت رعد أنا برق

أنا رعب أنا الماضي الصعب

أنا إنت لما وقعت

أما الشيطان وزك وسمعت

أما إتعميت ولقلبك بعت

أنا الألم اللي في قلبك، أنا قلم كتب نعيك أنا

أنا قلم على خدك، أنا اللي هنتك كسرتك أنا

أنا علم على أرضك، محتل فاكرني حررتك أنا

مهما تكبر أنا أصلك، أنا جذور شجرتك أنا

[اللازمة]

بحاول ومش بإيدي

أنا عارف إنك مش حقيقي

بشاور على بكرة ومش بيجي (مش بيجي)

يمكن تنساني وأكون أنا

[المقطع الثاني]

إتولدت في ضلمة فطلعت شمعة

ممكن أبقى نور وممكن أبقى ولعة

الدنيا إختبار وإحنا زي النار

هنور ولا هنحرق، إحنا اللي بنختار

أنا جوة مني فكرة عايزة تحبسني

الدنيا إدتني قلم غير الألم اللي في جسمي

مسكت بإيدي القلم غرزته جوة نفسي

رسمت بيه لوحة ومضيت تحتها إسمي

إسمع

غرزت جامد جوة نفسي بغرق

بحفر في اللاوعي بحاول أدرك

نافوخي شجرة عمرها مية سنة

كل مدى بتتفرعن بقرب للسما

جذوري بتدّفن بنسى مين أنا

بحاول أفتكر والذكريات مؤلمة

بخدر في الضمير، بسكن في النافوخ

جوة مني أسئلة كتير محاوطها الخوف

بحبك ولا دي كدبة عايشها من زمان

يمكن أناني بحب نفسي عشان إنتي الأمان

بشوف نفسي بعيني ولا بعيون الناس

يا ترى أنا كداب ولا صادق في الإحساس

مهدئات مسكنات بتشطب على الأسئلة

الدنيا هيروين والشخصية مدمنة

بحود شمال يمين عشان أهرب من التروما

بس كل الطرق بتأدي لروما

[اللازمة]

بحاول ومش بإيدي

أنا عارف إنك مش حقيقي

بشاور على بكرة ومش بيجي (مش بيجي)

يمكن تنساني وأكون أنا

بحاول ومش بإيدي

أنا عارف إنك مش حقيقي

بشاور على بكرة ومش بيجي (مش بيجي)

يمكن تنساني وأكون أنا

[الخاتمة]

بُعد، وعد، رعد، رعب

صعب، وقعت، سمعت، ضعت